Pubblico questi versi dialettali di COSENTINO Rosa Bianca, mia moglie, relativi a un aspetto della vita di paese negli anni della sua infanzia.

A GADDINA “STRAVIATA”

"Cicci… cicci… puripò…"

e la fimmina chiamava,

iva n’cerca da gaddina

cca taccaglia gilestrina.

S’addannava puviredda

giriannu pi li strati,

si cridiva ca a gaddina

fussi propriu straviata.

Tutti l’autri gaddini

già s’avivanu aggiuccatu

n’di la caggia pianu pianu,

ppi  passari la nuttata.

Cci mancava sulu didda

“Unni iera, unni stava?”

Ccu li lacrimi nni ll’ucchi

la patruna la circava.

E vicini addumannava:

“A  tu vistu a ma gaddina

di culiri pirnicigna

cca taccaglia gilistrina?”

Turnà dintra stanca e abbinta,

nun sapiva cchiù cchi fari…

Si curcà ma nni lu sunnu:

“coccodè” sintiva fari.

Si susì di notti e notti,

grapì a porta e s’affaccià;

sintì sciauru di brodu

e lu cori cci siccà…

Capì allura ca a vicina

a gaddina cucinava,

mentri u priju de carusi

n’di l’aricchi cci arrivava.

Iera festa n’di dda casa,

n’di dda casa puviredda

ca a pignata finarmenti

cucinava a gaddinedda.

Iera luttu ppa patruna

ca lu cori cci abbattiva,

cci abbattiva tantu forti    

ca o 'n momentu assantumava.

Lu duluri  la purtava

a mmazzari la vicina:

cumu didda senza cori

ammazzà la so gaddina!

Già la scupa avìa pigliatu

pp’ammaccaricci la testa…

ma un pinsiri la firmà:

nnì  dda casa puviredda

ppe carusi iera festa!

Lu duluri iera forti,

ma lu cori cci trimava

pirchì quannu era carusa

puru didda disijava

un pizzuddu di gaddina…

E allura, cota cota,

turnà dintra Cuncittina.