U CHIAMU, poesia della concittadina Rosa Bianca Cosentino

U CHIAMU è una poesia della nostra concittadina Rosa Bianca Cosentino già pubblicata nel sito dei villarosani.it.
La poesia fu prima in classifica nel Concorso "Botteghelle" indetto dal Comune di Fiumefreddo di Sicilia e quarta al Premio "V. De Simone" indetto dal Comune di Villarosa

U CHIAMU
U chiamu era un disperato quanto ingenuo appello a persona cara che da tempo non dava notizie e praticato fino a qualche tempo fa da madri o spose della nostra gente. Queste in luogo aprico e solitario di notte lanciavano un accorato richiamo il cui eco di ritorno veniva quasi sempre interpretato come fausto segno. Non di rado però, un casuale passante, per pietà o per burla, completando l'eco, alimentava una disperata speranza.


L'aria sirena nun smovi ‘na foglia,
sintu cantari fistusi li griddi,
mentri d'atturnu ccu vuci suavi
parlano e jocanu li picciriddi.

Sugnu ‘ncampagna, ‘n cuntrata Li Pira,
cca ma famíglia sugnu assittatu,
omu anzianu, ma omu cuntentu
d'aviri tanti niputi a lu latu.

Tutt'a na vota, Pinuzzu, u picciddu,
dici a Giuànni: - Gridamu, gridamu,
jucamu a l’eccu ca duppu tanticchia
li nustri stessi paroli ascutàmu.

Grida Pinuzzu, grida Giuànni
e l'eccu sempri fìdeli rispunni;
mentri ca jòcanu i cari ‘nnuccenti,
mi ‘nfoca u cori, mi curri la menti:

lu ma pinziri mi porta luntanu,
mi veni mmenti la ‘zzi Mariedda,
quannu, carusu pigliava a ma manu
e mi diciva: - Cci vini a Purtedda?

Facìmu u chiamu a ma figliu Pippinu,
ca nun mi scrivi e si trova a la guerra;
chidìmu a l'eccu e vidìmu s’un gnurnu
torna lu giuvini nni la so terra!

La vicchiaredda gridava e chianciva,
gridava forti: - Mi turni, Pippinu?
Mentri darrì la muntagna luntana
vuci piatùsa accussì rispunniva:

- Ritorna... torna... torna Pippinu,
timpu ‘a spittari iuncinnu li manu
e certu u’ gnurnu lu po' rincuntrari,
forsi ssu iurnu u gne tantu luntanu…

La vicchiaredda turnava cuntenti
e mi stringíva cchiù forti la manu
e lu so passu nun gnera cchiu lentu,
iva dicinnu: - Mi torna Pippinu!

Passà lu timpu e Pippinu 'un turnà,
murì di lacrimi la vicchiaredda;
e sulu tannu nno munnu dei giusti,
ncuntrà lu figliu la zzi Mariedda.

Chianciu, a sugliuzzu ‘n cuntrata Li Pira
ccu l’ucchi chini di lacrimi amari,
guardu scantatu li ma niputíddi,
sempri ‘ i vulissi ccu l’eccu jucari...

Mai vulissi ca un rre Ciccupeppi
issi chiamannu li figli da genti
ppi la so gloria e ppi lu so putìri
mentri a li matri 'un ci arristassi nenti!
Rosa Bianca Cosentino